O falar non ten cancelas

Un goberno "socialista" unha vez máis retrocede diante da igrexa. Seguiremos coa materia de relixión nas escolas públicas, ademáis o que é peor de todo abrimos a posibilidade de que en ditas escolas do estado se impartan no futuro máis relixións como a musulmana, e é lóxico, se os católicos teñen dereito a empregar os orzamentos públicos ao seu capricho para impartir o seu dogma de fe, porque non o ían facer os musulmans, colectivo que será cada vez mais numeroso nun breve espazo de tempo.

Quixéramos engadir que é patético ver a moitos católicos ouvear en contra das repúblicas islámicas, cando eles se negan a separar relixión de estado. Para nós non hai diferenza, son iguais de fundamentalistas.

Ademáis, o peor de todo e ver como o goberno do estado español que se di "progresista" claudica diante da igrexa e renuncia a facer do estado, un estado moderno e laico.
As relixións débense impartir cada unha no seu templo correspondente (igrexa, sinagoga, mezquita...). Un estado moderno e democrático non está para contribuír á doutrina de ningunha fe.

Por último o que é xa o colmo e oír aos representantes da igrexa católica chamarlle doutrina aos contidos da futura materia de educación para a cidadanía, doutrina á transmisión de valores democráticos, tolerancia e civismo.

Iso, non vaia a ser que as ovellas esperten!.

Posto por MacLapfer, Trasno e Fror de Toxo.

Perdoade a miña insistencia con este tema, pero é que estou a ler cousas nalgún medio que me están a cabrear bastante.
Agora parece ser que hai que xustificar a retirada da democracia participativa no BNG dicindo que existen moitos militantes que non participan nas asembleas locais e comarcais e que logo van só a nacional a votar e amosar o seu descontento.
É certo que existen moitos militantes que non participan nas asembleas locais e comarcais, uns porque non queren (desencanto, apatía...) outros porque non poden (horarios,traballo... ao mellor moitos dirixentes do BNG non se percataron que moitos dos seus militantes non son funcionarios). E outros coma é o meu caso por ambos motivos.
Pero aínda así temos dereito a opinar cando e onde nos pete, basta xa de criminalizar as bases militantes non estamos só para pagar a cota e as aportacións extraordinarias para que logo outro opine, fale e vote por nós. Quero facelo eu,aínda que so sexa unha vez cada asemblea nacional. Quero ter ese dereito que me quitaron nese suicidio asemblear. No meu nome non, debemos traballar para recuperar a democracia compañeiras e compañeiros.
Aínda quedan as asembleas comarcais e locais para que aumente a presenza dos que cremos na democracia no consello nacional.

Posto por MacLapfer.

Todos os días, cando acompaño ó Trasno á parada do bus escolar, escoito interesantísimas conversas acerca dos máis variados temas: matemáticas (onte puxen dúas lavadoras e hoxe tres), metereoloxía (vou tender a roupa fóra porque o vento...) deportes (ainda que se despois chove terei ir correndo...) prevención de riscos laborais e ergonomía (de tanto cargar co cesto teño a cadeira destrozada), ou economía (se coloco a roupa así no radiador seca antes).

O problema non é tanto o contido conversa, ou a falta del, como o feito de que unha individua monotemática a monopoliza repetindoa invariabelmente unha e outra vez como se dun bucle se tratara, ata chegar ó extremo de que todo o que pode se escaquea da tarefa de ir buscar ó Trasno á parada.

Neste contexto calquera pequena variación é ben recibida e o outro día suspirei con alivio ó comprobar que se mantiña unha conversa totalmente allea ás labores domésticas. Contaba que na última reunión coa titora dun dos seus fillos outra nai se queixaba de que á súa idade aínda non aprenderan os ríos e os seus afluentes.Empezamos a falar da crueldade de torturar ós rapaces con datos inutis como o caudal dos ríos cando de repente escoito "ainda me lembro dun horríbel traballo que nos mandaron facer sobre Leonardo da Vinci, xa me dirás, para que coño quero eu saber que fixo Leonardo da Vinci?" empecei a alarmarme, intuía que camiño ía tomar a conversa e efectivamente a cousa foi a peor porque continuou "e o arte grego?, a ver, de que me sirve a mín na miña vida coñecer nada do arte grego?".

Durante un segundo quedou calada, por un momento pensei que ía enmendar a enorme parvada que acababa de dicir,e entón dixo: "bueno, si, unha vez, cando fixemos a casa e compramos as pedras para as ventás. Entón o señor falou do debuxo grego e eu entendino, incluso puden presumir"

Posto por Fror de toxo

Que podo dicer da asemblea que non se dixera xa, as veces falamos de máis incluído servidor, pero para isto teño o blogue que teño. O falar non ten cancelas.
Unha vez dito isto, quero dicer que por unha banda estou triste e decepcionado por ver que un sesenta por cento da militancia votou unha redución da democracia participativa, votou a destrución dos valores fundacionais da organización, en definitiva votaron "menos BNG".
Pero como ben sabedes as cousas son como se queren ver, o vaso medio cheo ou medio baleiro. Acto seguido tamén pensei, tamén houbo un corenta porcento dos militantes que votaron que non a esa reforma organizativa, un corenta porcento que non se deixou influír pola presión do grupo liderado polo poder, e tivo a autonomía moral suficiente para votar que non, e ser fiel aos valores asemblearios do BNG.
A esperanza está alí, non nos enganemos nese corenta porcento que animo a que loite dende hoxe mesmo para recuperar o BNG, recuperar os valores da democracia participativa. E o meu soño é que na próxima asemblea nacional a "vangarda" do pobo, "la créme de la crème", a élite... recapacite, corrixa este erro e deixe de estar instalada na premisa de "todo polo pobo, pero sen o pobo", de non ser así haberá que suscitarse encomezar de novo dende cero.

Posto por MacLapfer.

Buscamos gañador para o vindeiro mes, as nosas propostas de feismo de xardín son a cal peor pero vós decidides, podedes empezar a votar por contedor ou antena. Grazas pola participación.

 "Sangue ruin é o nome máis repugnante que hai para falar da persoa que naceu  de mugles,xa sabes, de pais que non son magos".

Non podo evitalo, é que a ocasión me ven ó pelo así que me vexo na obriga de confesar que son Pottermaníaca perdida.Para os que non estén familiazados coa saga de Harry Potter este post será incompresible, pero para todo aquel que sufra da miña "enfermidade", ou que simplemente teña fillos que o arrastren ó cine cada vez que se estrea unha nova película dicídime: a frase "por qué los nietos de emigrantes españoles tienen dificultades para lograr la nacionalidad, cuando la obtiene cualquiera sin sangre española" ¿non é digna do peor e máis ruín dos mortífagos?.

Igual resulta que o señor das tebras está entre nós e non soubemos ver os sinais:

"¡Temede, inimigos do herdeiro! ¡Os próximos seredes os sangue ruin!"

posto por Fror de toxo e Trasno

El presidente del PP de Galicia, Alberto Núñez Feijóo, pidió ayer al Gobierno que explique por qué los nietos de emigrantes españoles tienen dificultades para lograr la nacionalidad, cuando la obtiene "cualquiera sin sangre española".

 (...)

exigió al Gobierno español que explique a los emigrantes por qué sus nietos "con derecho a la nacionalidad española" no la obtienen, mientras sí lo hacen "los africanos del norte, los europeos del este o cualquiera que no tenga sangre española. (EL CORREO GALLEGO).

Poucos comentarios se poden engadir a estas detestábeis palabras e iso que se supón que Feijoo representa a moderación e modernidade do PP en Galicia, Deus nos libre que veñan os conservadores radicais.

Persoalmente non vexo nin necesario, nin xusto que se conceda automáticamente a nacionalidade á terceira  xeración de inmigrantes (ao menos que toda a familia decida retornar a Galiza), os dereitos deben ser para quen os necesite e utilice no noso país. En segundo lugar, me parece deplorábel que para gañar votos cos emigrantes galegos de América, os teña que pór en contra dos que por necesidade veñen a traballar nas nosas terras, por moi "africanos que sexan", e por último tiveron dezaseis anos para darlles a nacionalidade se tanto lla quixeran dar no seu día.

Posto por MacLapfer

Ola a todos,

 Aquí tendes un dos motivos polos que non participo moito deste blogue, é para un concurso que todos os anos organiza o meu concello.

Posto por Trasno.

 Quedan poucos días para que anunciemos oficialmente cal é a foto gañadora do noso concurso de feismo, se non vos animades a votar a gañadora será proclamada con só dous votos :(

O mes que ven estamos pensando adicalo a feismo de xardín.

Por favor, os poucos visitantes que temos, anímadevos a votar.

Posto por Fror de toxo